日本旅遊資訊

【走進宮崎駿世界】三鷹の森吉卜力美術館全攻略

宮崎駿創作出好多膾炙人口嘅動畫電影,呢啲平凡但被細膩刻畫嘅故事陪住你同我一齊成長。而宮崎駿亦都打造咗屬於自己嘅美術館,等大家可以更加貼近佢嘅動畫世界。喺東京嘅三鷹之森吉卜力美術館就可以帶你走入佢嘅奇幻創作世界入面,快啲入嚟一齊做一日大細路啦~

KKdap App

一、吉卜力美術館交通

圖片來源|KKday

去三鷹首先要搭JR 中央・總武線(各站停車)/中央線(快速)去「三鷹站」,再由三鷹站南口出嚟轉接駁巴士。

圖片來源|KKday

▲只要認住三鷹之森吉卜力美術館嘅專用巴士牌(有隻小小龍貓趴喺上面,超級好認!),或者黃色嘅專用接駁巴士車就冇錯~

圖片來源|KKday

▲另外巴士站牌下面都會有巴士時間表。

▶︎接駁巴士價錢:大人210日圓(單程)、320日圓(來回);小孩110日圓(單程)、160日圓(來回)
▶︎官網:吉卜力美術館交通

圖片來源|KKday
圖片來源|KKday

▲沿途會見到好多有心思嘅裝飾,指領你去宮崎駿嘅國度~

二、吉卜力美術館門票

門票一定要提早訂購,一日得四場,四個場次嘅時間分別係10點、12點、下晝2點同下晝6點,Lawson每個月10號都會開放預購下個月嘅門票,而KKday就係每個月1號上晝10點到5號嘅下晝6點半開放購買吉卜力美術館門票。

圖片來源|KKday

門票係菲林造型,菲林係宮崎駿動畫入面曾經出現過嘅動畫場景,勁靚!小編仲聽聞有人話過呢啲菲林門票目前為止未重複過㗎!(至於係真定假就要留比大家去多幾次確認啦~)

▶︎吉卜力美術館門票喺度買~(每月1號10:00 – 5號18:30)

三、館內介紹

圖片來源|KKday

三鷹之森係一座麻雀雖小但五臟俱全嘅精緻博物館,裡面收藏咗好多關於宮崎駿嘅作品、手稿、繪圖等等。第一任館長係宮崎駿本人,成個空間嘅設計都係由宮崎駿構想而嚟,由踏入美術館嘅嗰一刻,無論你係咪宮崎駿嘅Fans、有冇少女心都好,都一定會為每個精緻又細心嘅設計而著迷。

成個地圖同場內設計都係採用迷宮造型,就好似宮崎駿喺地圖上面留低嘅標語「迷子になろうよ、いっしょに。(等我哋一齊成為迷路嘅孩子啦)」,唔想大家照住既有嘅順序去參觀場館,希望可以喺入面喚起每個人最純真嘅心靈角落,一齊做迷途小羔羊~

小編提醒:館內一律禁止影相、飲食,而館內空間亦都有限,所以推唔到BB車入去,服務人員會統一將推車放喺地下一樓。

由路口到大廳嘅玻璃窗、入口玄關

由路口嘅工作人員手中拎到帶有動畫菲林嘅門票之後,要先行一小段路去大廳玄關位,而呢段路途中會經過幾塊玻璃窗。千祈唔好以為佢只係一片透明玻璃,呢啲玻璃上面全部都用彩繪畫咗宮崎駿動畫電影入面嘅橋段,透過光與影嘅轉換,反照出各種樣貌,另外入口玄關處都有超大嘅天庭彩繪。

正廳

入咗玄關之後你就會為入面各式各樣嘅裝潢讚嘆不已。你會見到各種木製裝修、好似鳥籠咁狹小嘅迴旋樓梯、復古典雅嘅電梯、層層堆疊嘅錯位空間;仲有被彩繪玻璃所環繞嘅四周,同可以透入陽光嘅透明樓頂等等。就好似宮崎駿講嘅咁,館入面就係一個會令你蕩失路嘅迷人空間,而小編就覺得呢度更係一個可以等大人同小朋友都重溫夢想嘅奇幻世界。亦都因為場入面唔可以影相嘅關係,大家去嘅時候會更專心欣賞美術館入面嘅細心佈置。

企劃展示室

呢個展示室唔限制於只有宮崎駿嘅作品,同時亦會展示特定作家、動畫家、工作室嘅作品。每期嘅主題都唔同,大多數會以上映中嘅吉卜力工作室動畫為主,亦都曾經請過Pixar嚟開展。小編個人就覺得呢度好似一個日本海內外嘅動畫交流區咁,都好值得去睇。

而由今年五月初去到出年嘅五月初都會以「食べるを描く。」為展示主題,主要係展出宮崎駿動畫電影裡面有關於食物同食野畫面嘅場景。聽起嚟你會覺得冇咩特別,但宮崎駿動畫就係可以將平凡嘅生活場景描繪出驚人嘅細膩度,等你可以由另一種角度去感受平凡生活中入面嘅不凡之處。

常設展覽室「動畫的起源」

常設展示室呈現咗點去製作動畫同動畫原理,好似係景深、視覺暫留呢啲相關知識同埋動畫歷史嘅演進。呈現方式會以宮崎駿作品作為示範,設置大型投影屏幕,將平面嘅動畫以互動嘅方式呈現,令動畫製作唔再係紙上談兵嘅沉悶原理,而係用趣味性嘅體驗幫大家了解快速翻頁嘅殘像、光與影嘅轉換等原理。

小編一踏入呢個微暗嘅空間入面,就率先比一幅幅用相框錶起嘅動畫場景所吸引。喺光影嘅轉換下,更加近距離咁欣賞到人物嘅微細表情,再向前行就可以親自體驗到視覺暫留點造成動畫人物漸進式嘅跳躍動作。就算冇中、英文導覽,大家都可以一睇就明。

動畫工作室-電影誕生的地方 (少年的房間)

上到二樓之後,相信會係每一個宮崎駿Fans最期待嘅地方!呢度記錄咗宮崎駿少年時期所點畫嘅手稿,以及分鏡圖係點喺佢筆下呈現,仲有宮崎駿少年時期間房,據講係百分之八十咁完整呈現!睇落帶點凌亂嘅牆上、枱面同書櫃,全部都充滿住宮崎駿筆下精細嘅作品原圖、隨手筆記、顏料同參考書等等,就連房間嘅小角落都有削到極短嘅鉛筆,呢啲小細節就好似逐樣堆砌起宮崎駿嘅青春時光呈現比大家睇一樣。

動畫工作室總共分為五個相通嘅房間,分別係「構思」、「演出(分鏡)」、「作畫」、「上色」同「攝影、編輯與錄音」。五間房間完整咁呈現出宮崎駿嘅工作室場景,令大家可以了解到動畫係點由一個小概念變成一部帶比大家溫暖嘅動畫,同埋呢啲夢幻場景係由邊度取景、邊度得到靈感等等。小編一入去睇到唔同場景嘅原型場景相真係會有種由心底裡面油然而生嘅感動,感覺自己就喺大師筆下最近嘅距離去感受佢嘅作品一樣。

龍貓巴士

睇過龍貓嘅大家,今次龍貓唔再隔住個Mon喺動畫出現,而係變成咗現實嘅巴士!龍貓巴士喺館入面以柔軟布料製成,提供比小學以下嘅小朋友喺上面玩、跳同搭。而已經唔係小學嘅大家,就算再童心未泯都只可以乖乖地望下梅止渴啦⋯

映像展映室「土星座」

想做宮崎駿動畫嘅VIP? 咁喺行完常設展示室之後就要去映像室睇下宮崎駿未曝光嘅小動畫啦~雖然未必聽得明日文,但都仲係好值得去睇下~而且望住動畫主角嘅動作,並唔難估到內容係講緊咩,呢個就係宮崎駿嘅厲害之處,細膩程度已經超越咗語言嘅隔閡~動畫內容仲會不定期更換,而主題會同企劃展映室嘅主題相扣。話晒都係限定版嘅宮崎駿動畫內容,點講都唔可以錯過啦!

圖書閱覽室

圖書閱覽室其實就係一間小型書店,會出售繪本同埋同吉卜力相關嘅書,如果你識日文又或者係宮崎駿Fans,買本返屋企收藏都係一個唔錯嘅選擇~

吉卜力周邊產品商店

小編當初一入到商品店真係好想買晒成間舖落嚟~無論係龍貓嘅鑰匙扣、精緻嘅吉卜力美術館專屬貼紙、縮細版吉卜力美術館造型嘅時鐘定係拼貼而成嘅動畫經典場景Postcard,都令小編默默咁打開個銀包係咁拎錢出嚟~小編都眼見好多人拎住一大袋行出美術館⋯

美術館入面所展示嘅嘢真係應有盡有,仲有好幾區係依據比例打造咗宮崎駿動畫入面出現過嘅物品,例如係天空之城入面嘅飛行機,仲有縮細版嘅哈爾移動城堡,你仲可以透過細窗見到城堡入面冒緊嘅蒸汽~成個美術館就好似宮崎駿嗰個靈感源源不絕嘅大腦其中一角咁,不其然諗起宮崎駿運用巧思同獨樹一格嘅設計真係創作咗好多陪住大家成長嘅日本動畫。

四、場館外介紹

龍貓售票亭

圖片來源|KKday
圖片來源|KKday

由入口一入去就可以見到大大個龍貓售票亭,不過呢座售票亭唔係真係賣飛㗎,佢只係純粹比大家打下卡影下相,裡面仲坐住一隻大龍貓,就好像歡迎緊大家入去宮崎駿嘅夢想國度一樣~側邊以黃同啡色打造嘅木製門都好值得影嚟留念!建議大家可以比預定入館嘅時間早少少去,咁就可以喺周圍影夠相先入去啦~

機器人士兵

圖片來源|Su

室內有巨大嘅鳥籠迴旋梯,而室外都有通往頂樓花園嘅鐵梯,一樣採用迴旋設計,由樓梯上去之後就可以見到《天空之城》嗰個溫柔嘅機器人士兵。而成座屋頂花園就好似仿造天空之城咁,嗰個失落嘅國度裡面有住最令人嚮往嘅世界,而機器人士兵就好似電影入面咁,默默地守護呢座由宮崎駿打造嘅幸福堡壘。如果想同機器人士兵影相係要排隊㗎!

天空石

iris.kkhk | KKday

喺機器人士兵唔遠嘅地方、雜草叢生同石塊蔓延而成嘅走道背後有住刻畫咗拉普達語言嘅灰黑色石頭。每個保有純真、有住毅然決然勇氣嘅人都可以成為天空之城嘅後裔。宮崎駿嘅動畫哲學永遠傳達住「少點奸詐、多點純真」嘅意念比忘記最初衷嘅每一個人。

咖啡廳「草帽」

圖片來源|KKday

喺出口地方仲有室外咖啡廳,如果行到攰不妨坐低飲杯咖啡食個Tea,呢度有好多特別嘅Menu,如果唔趕行程小編都推薦大家可以試下~

汲水亭

以紅色嘅挑高亭設置出獨特嘅汲水空間,周圍有木柴、綠色小房嘅造景,令人好似唔小心闖入咗一個夢幻嘅後院一樣,匠心獨具嘅色彩配色令大家求其影都會似置身喺童話故事入面咁~

魔女宅急便-繪畫港口

因為美術館入面唔可以影相,所以大多數嘅畫都只可以用眼睛刻畫喺腦入面,但其實戶外仲有一個小拱形窗收埋咗啲小驚喜,有住穿透光線嘅魔女宅急便場景,所以搵到呢個拱形窗戶嘅你,不妨留低影張相留念!

圖片來源|KKday
圖片來源|KKday

其實吉卜力美術館處處都充滿驚喜,例如係水龍頭上面會出現魔女宅急便入面嘅黑貓,或者某個窗可能會有某個宮崎駿動畫嘅人物,就連廁所嘅門口都有做到好似個鳥籠咁~鮮豔配色加上創意設計,每個小角落都可以發現極具巧思嘅佈置,令大家會心微笑。

嚟到東京你應該會需要:
▶︎吉卜力美術館門票喺度買~(每月1號10:00-5號18:30)
▶︎去東京一定唔可以少咗呢張上網卡嚟打卡!
▶︎買埋呢張MetroPass就可以喺東京坐地鐵放題!

想玩盡東京?不如睇埋:
▶︎【日本東京台場】大江戶溫泉物語懶人包介紹
▶︎【東京機場大解密】成田、羽田機場交通攻略

認識KKday

想挑選心水行程又怕浪費時間比較?KKday 作為亞洲最大旅遊體驗平台,網絡橫跨全球 80 個國家、500 個城市,為您搜羅超過 10,000 種特色行程體驗。只需安坐家中,就能訂購世界各地具品質保證、價格實惠的旅遊產品,助你輕鬆自主行程,創造獨一無二的旅遊體驗。

▲前往KKday 網站,訂購心水行程!
▲下載KKday App與你同行,發掘更多在地旅遊體驗!
▲訂閱KKday電子報,獲取更多旅遊優惠!
FacebookInstagramYouTubeKKday群組

留言
KKday Hong Kong
訂完機票和飯店,當地旅遊體驗就交給KKday。 自己的行程自己排 – 海外潛水、戶外攀岩、料理課程、私房景點、 一日遊、票券、包車旅遊、機場接駁,各式世界當地旅遊行程任您挑選!
%d 位部落客按了讚: