環球旅遊

【西藏丨中伏篇】KKday西藏自由行全攻略!

image

西藏係唔少背包客必到嘅聖地,小編去完之後都完全認同佢嘅自然美。不過,有唔少陷阱真係去過先知,雖然未去到令人卻步嘅程度,但如果去之前可以預先知道,相信小編嘅旅程會少好多煩惱!唔想好似小編咁中伏,就要睇真啲下面嘅貼士啦!

KKdap App

一‧香港人=外國人

image

睇到呢個標題請不要沾沾!話你係外國人,意思係你要比「當地人」遵守更多規矩!本身小編去之前已經搵好唔同旅館,發現平到笑,一晚只係幾十蚊,甚至十幾蚊人仔就有交易!不過因為要用大陸銀行卡比錢,加上司機話去到先搵住宿都可以,所以我地就冇預先訂定!

去到先發現唔係所有旅館都可以接待香港人,就算上網比左錢,如果登記證件發現你係香港人,都唔會比你住~不幸中之大幸係我地無訂到,雖然最後住嘅酒店比預期中貴,但其實都好抵!(想知更多就要留意住宿篇啦)

二‧時間的重要性

image

五月至八月係西藏嘅雨季,但同時因為天氣比較暖,亦係旅遊旺季,所以來回機票、火車票、住宿,甚至某啲旅遊景點(例如布達拉宮)門票都會貴啲,而且更難搶飛!

不過小編覺得旺季最大問題係遊客太多,仲要係大陸……你懂的!所以如非必要,就唔好旺季去!當地司機教路,三至五月雖然山無咁綠同埋凍啲,但少雨天色夠藍,仲要無雲,包你影到靚相!西藏最最最重要係影靚相嘛,落雨陰天有烏雲真係大打折扣!

三‧角度的重要性

image

影相嘅角度係十分重要,所以西藏好多景點都設有觀景台,但如果你想喺呢啲位置影相,係需要比入場費!例如係羊湖(羊卓雍錯),差唔多上到崗巴拉山頂嘅時候有「觀景台」(其實都只係放個牌喺到),想喺觀景台影相要喺入口預先買門票,盛惠四十蚊人仔!

不過,行前幾步又係一條好漢,唔洗同一堆人爭位而且係免費!所以小編諗唔到要做水魚嘅原因喔~

四‧旺季去布達拉宮請用錢解決問題

image

每年五月一號至十月三十一號(官方旺季),布達拉宮門票價格係二百蚊人仔(淡季一百蚊),而且要預早一日去排隊買飛,名額七百個,每人可以買四張(要有有效身份證/回鄉證)。第二日再喺指定時間出現,參觀時間限定一個鐘!睇到呢到,係咪已經意欲大減,但小編就係喺咩都唔知嘅情況下去左排隊!!

當日小編凌晨四點半起身,排四個半鐘隊(仲要無停過雨),期間不斷有黃牛兜售,價錢大概係四百起跳。對於黃牛小編係極度反感,一方面無諗過去布達拉宮都要比錢佢地賺,另一方面係我已經四點半起左身,點解去到先買黃牛?雖然小編同旅伴都十分有骨氣,但骨氣好明顯唔可以當飯食,浪費左一個朝早,我地嘅下場係又餓又凍,最後都係買唔到入場劵!

呢個故事教訓我地,有時候係需要用錢解決問題,如果你都係要「旺季」去,除左幫襯旅行社同黃牛,你都可以選擇唔去嘅~好似小編咁無機會入布達拉宮,都可以過條馬路上藥王山觀景台,可以影到布達拉宮側面,正面相就喺布達拉宮廣場影!

五‧野可以亂食、相唔好亂影

image

我諗其實唔只係西藏,大陸好多地方都係,擺個牌、立個石碑、放隻動物都可以收你錢。醒目仔女當然就要喺影相之前望下兩邊有冇人啦!不過,小編喺納木錯嘅時候,就有位姐姐帶住隻馬闖入我嘅鏡頭,問我騎唔騎馬,我拒絕之後,佢就話我影佢隻馬要收錢……更離奇係當小編去湖邊影相,影影下個天有位妹妹行過黎,話黎影相要比錢!遇到呢啲情況,唔好驚唔好怯,呢班人絕對係欺善怕惡,只要你大聲拒絕、堅持唔比佢就會行開!

六‧藏族司機 唔洗買飛

image

去到要買門票嘅景區就留意啦~如果你嘅司機係藏族人,係唔需要比錢買飛嘅,如果係漢族司機就要先問問,不過大部分景點都唔需要司機比錢!小編去納木錯買飛嘅時候,問職員需唔需要幫司機買飛,職員話要,但出到去司機就話唔洗!仲成功退番錢,所以買飛前要問清楚啦!

七‧珠峰邊防證四人同行

image

去珠峰要整邊防證相信好多人都知,不過原來每次要有四個人或以上先可以整到咖!話說去珠峰前一日,司機幫我地整邊防證,我地發現上面多左個人名,問落先知原來整邊防證最少要四人同行~如果你係自由行又唔夠四個人,就要請司機幫手加多個漢族人落去湊夠數,代價只係比多幾十蚊,所以問題不大~

八‧人有三急都要袋定散紙傍身

image

圖片來源

無論西藏嘅廁所有幾不堪,佢地都有面目收你錢!所以,點都要有幾蚊散紙傍身,因為佢地係唔會找錢比你!細細聲同你講,小編有一日十萬火急,銀包都冇拎就衝落車去廁所,去到門口先發現要收兩蚊,好彩哥仔見到我寫住個「急」字係額頭比我入左去先,如果唔係……我唔敢諗落去啦!

九‧渴睡症上山請自備牙籤

image

喺西藏每日唔係上山就係落山,加上車程極長,所以會喺車到昏睡都十分正常!頭幾日司機不斷提我地上山唔好訓教,係咁叫醒我地一齊傾計,因為怕我地訓一訓就爬高左三千米會有高反!不過,小編經常都抵抗唔到睡魔召喚,之後,司機就好似放棄左我地……

十‧千奇百趣潤唇膏

image

之前嘅【行李篇】有提過,要用密實袋入好啲護膚品,點知小編都避唔過呢一劫!奉勸各位去西藏或者其他高原地區的話,唔好帶呢種包裝嘅潤唇膏,因為每次開蓋,佢就會自動湧出黎,變成一粒水珠,直至佢爆開為止,雖然冇整污糟其他野,但超級浪費!

有啲野唔係親身經歷過真係唔知咖~記住以上嘅貼士,下次去西藏唔好中伏啦!

想舒舒服服去西藏?KKday幫到你!

更多西藏自由行攻略:

【西藏丨交通篇】KKday西藏自由行全攻略!
【西藏丨行李篇】KKday西藏自由行全攻略!
【西藏丨住宿篇】KKday西藏自由行全攻略!
【西藏丨預算篇】KKday西藏自由行全攻略!

▲認識KKday▲
KKday-世界旅遊體驗網站,在全球 54個國家,174 個城市, 有 5000多種不同的行程與體驗。 KKday內有最特別、最意想不到的的世界行程體驗!不論你想當一日忍者、乘坐直升機享盡奢華旅程、還是你想要與猩猩共進午餐…KKday滿足旅人不同的喜好。KKday幫你省去在各論壇爬文找資料的麻煩,一站解決安排行程的困擾!現在,想來一場與眾不同的旅行就來KKday找行程,一起去冒險吧!
KKday 網頁: www.kkday.com
KKday Facebook: KKday

認識KKday

想挑選心水行程又怕浪費時間比較?KKday 作為亞洲最大旅遊體驗平台,網絡橫跨全球 80 個國家、500 個城市,為您搜羅超過 10,000 種特色行程體驗。只需安坐家中,就能訂購世界各地具品質保證、價格實惠的旅遊產品,助你輕鬆自主行程,創造獨一無二的旅遊體驗。

▲前往KKday 網站,訂購心水行程!
▲下載KKday App與你同行,發掘更多在地旅遊體驗!
▲訂閱KKday電子報,獲取更多旅遊優惠!
FacebookInstagramYouTubeKKday群組

留言
KKday Hong Kong
訂完機票和飯店,當地旅遊體驗就交給KKday。 自己的行程自己排 – 海外潛水、戶外攀岩、料理課程、私房景點、 一日遊、票券、包車旅遊、機場接駁,各式世界當地旅遊行程任您挑選!
%d 位部落客按了讚: