日本主題樂園

【日本】東京迪士尼海洋最強攻略

講起東京,大家都一定要識得東京迪士尼樂園。但東京迪士尼又分開樂園同海洋兩邊,咁究竟東京迪士尼海洋有咩咁特別、有咩好玩?今次就等KKday同大家介紹下日本獨有嘅東京迪士尼海洋(Tokyo DisneySea ),交通攻略、必玩設施、必食美食、必買商品、Fast Pass 攻略一次過話你知!

KKdap App

一、東京迪士尼海洋交通

圖片來源|KKday

1. 巴士

新宿巴士轉運站(新宿車站)搭巴士到東京迪士尼海洋3號候車區,大約40分鐘。全票1000日圓,兒童票500日圓。

2. 鐵路

東京地鐵去到東京站,再轉JR京葉線或者JR武藏野線舞濱站。入咗度假區之後,可以搭園入面嘅單軌電車或者巴士入東京迪士尼海洋站。

二、推薦設施

迪士尼海洋總共分成七大區域,每一區都有自己嘅特色,好似阿拉伯海岸、美人魚礁湖呢啲一聽個名就知喺咩主題,還有Duffy迷最鍾意嘅美國海濱、同埋之前因為海底奇兵進駐而人氣爆棚嘅發現港等等,依家就等小編嚟為大家介紹下每一區必玩嘅遊樂設施!

【美國海濱】

1. 反斗奇兵瘋狂遊戲屋

圖片來源|KKday

見到巨型胡迪,就知道係東京迪士尼海洋超受歡迎嘅設施— 反斗奇兵瘋狂遊戲屋!好似以前香港迪士尼嘅「巴斯光年星際歷險」咁,你會坐喺車上面同朋友展開一場射擊比賽,不過呢個會有埋3D效果!

2. 驚魂古塔

圖片來源|KKday

位於反斗奇兵瘋狂遊戲屋隔壁嘅驚魂古塔係有故事背景嘅,講從前有一個熱愛收集全世界各種古董嘅收藏家,因為堅持收藏一件受詛咒嘅寶物而喺搭電梯時,寶物同收藏家本人突然間離奇消失⋯由於呢間好多寶物嘅古塔已經丟空咗好耐,所以政府就決定開放俾民眾參觀。

▶︎樂園小貼士:因為反斗奇兵瘋狂遊戲屋同驚魂古塔係最近入口嘅Fast Pass設施,如果比較早入園,強烈建議先衝去反斗奇兵瘋狂遊戲屋抽Fast Pass,之後即刻排驚魂古塔!

【發現港】

1. 《海底奇兵》遊戲:Nemo & Friends SeaRider

圖片來源|KKday

以迪士尼Pixar電影《海底奇兵》為主題嘅遊樂設施海底巡遊艇,喺2017年5月新開幕之後就成為咗園內必玩嘅人氣設施!喺呢個4D影院入面,大家會坐上「海洋巡遊艇」,由前面螢幕嘅Mo仔同多莉帶我地去海洋世界冒險。

2. 水上逗趣船

圖片來源|KKday

坐水上逗趣船,穿梭喺漩渦、瀑布同間歇泉之間,喺就嚟撞船嘅時候來個大U Turn,勁刺激勁好玩!

【失落河三角洲】

1. 忿怒雙神

圖片來源|KKday

每個主題公園都唔少得大家熟悉嘅過山車,而忿怒雙神最大嘅特色就係超刺激嘅360度大旋轉,大家盡情尖叫啦!

2.印第安那瓊斯冒險旅程:水晶骷髏頭魔宮

圖片來源|KKday

話說印第安那瓊斯博士嘅助理策劃咗一場為遊客設計嘅冒險行程,不過唔小心驚動咗守護魔宮嘅水晶骷髏頭,所以就展開咗一段刺激嘅逃命之旅。無論係排隊定坐吉普車時周圍嘅佈置都好有氣氛,最啱又驚又想要少少刺激感嘅你~

【阿拉伯海岸】

神燈劇場

圖片來源|Ashley Hsu

神燈劇場係講述一個自稱為全世界最偉大嘅魔術師夏龐生第一次嘅個人Show,帶住3D眼鏡可以見到魔術師同神燈精靈嘅互動演出,得意又生動!

【美人魚礁湖】

1. 美人魚礁湖劇場

圖片來源|KKday

Wish I could be part of that world~喺美人魚礁湖劇場可以聽到美人魚獻唱〈Part of Your World〉、〈Under the Sea〉等經典歌曲!睇到人魚公主Ariel喺劇場入面咁開心小編都好想留喺呢個奇妙嘅海洋世界。但小編提醒大家劇場演出係禁止拍照錄影㗎~

2. Ariel遊樂場

圖片來源|KKday

睇完美人魚礁湖劇場,小編都好想感受下Ariel嘅生活,嚟到就有機會啦!喺Ariel遊樂場入面有海草做嘅小迷宮,又可以搵寶藏,小朋友一定會鍾意~

【神秘島】

地心探險之旅

圖片來源|KKday

地心探險係園內嘅熱門設施之一,雖然地心探險冇忿怒雙神同驚魂古塔咁驚嚇,不過玩玩下車速會突然變快,呢種出其不意嘅刺激感好受歡迎。

【地中海港灣】

威尼斯貢多拉遊船

圖片來源|KKday

想試下坐威尼斯嘅貢多拉船?唔洗去意大利,迪士尼海洋都有,可以坐喺船上面睇下景,啱晒玩完刺激設施之後想放鬆下嘅你~

三、推薦行程、設施

圖片來源|KKday

每次去迪士尼都好似一場戰爭咁,要一早Plan定好策略,一入場點搶Fast Pass、排咩熱門設施⋯咁先可以玩得晒想玩嘅遊戲!迪士尼海洋依家有10個可以拎Fast Pass(快速通關)嘅設施,留意返抽完一張Fast Pass後,要等2個鐘頭後先可以再抽下一張㗎!

▶︎ FP遊樂設施:
美國海濱 — 反斗奇兵、驚魂古塔
發現港 — 海底奇兵
失落河三角洲 — 忿怒雙神、印第安納瓊斯:水晶骷顱頭魔宮
神秘島 — 地心探險、海底兩萬哩

▶︎ FP劇場設施:
美人魚礁湖—美人魚礁湖劇場
阿拉伯海岸—神燈劇場

▶︎ KKday小編推薦:反斗奇兵、驚魂古塔、印第安納瓊斯:水晶骷顱頭魔宮

圖片來源|KKday

【唔鐘意刺激嘅朋友仔】路線

一入園,先去反斗奇兵抽Fast Pass,然後直接排隔離嘅驚魂古塔。玩完之後,再去抽印第安納瓊斯:水晶骷顱頭魔宮嘅Fast Pass,順路玩埋神燈劇場。

【鐘意追求刺激嘅朋友仔】路線

一入園就即刻向右邊方向衝,兜過地中海港灣去神秘島抽地心探險嘅Fast Pass,然後經過美人魚礁湖去失落河三角洲排印第安納瓊斯:水晶骷顱頭魔宮或者忿怒雙神,最後再去抽驚魂古塔Fast Pass!(夜晚嘅驚魂古塔更加有feel㗎!)

四、推薦美食
1. 三眼仔麻糬

圖片來源|Ashley Hsu

好得意啊!三眼仔麻糬總共有三個口味,分別係奶黃、士多啤梨同朱古力。另外,裝麻糬嘅三眼仔小膠碗都好可愛,食完仲可以帶回去留念!

2.卡通造型爆谷桶

圖片來源|KKday

迪士尼其中一樣最受歡迎嘅一定係超可愛卡通爆谷桶!小編最推薦嘅就是Duffy爆谷桶同2017年新設施海底奇兵出嘅Mo仔爆谷桶,淨係迪士尼海洋先有㗎!

Mo仔爆谷桶:
▶︎ 口味:焦糖、香草蕃茄
▶︎ 販賣地點:發現港
▶︎ 價格:2300日圓

圖片來源|KKday

Duffy爆谷桶:
▶︎ 口味:白朱古力、牛奶朱古力
▶︎ 販賣地點:美國海濱
▶︎ 價格:2500日圓

3. 煙燻火雞脾

圖片來源|KKday

迪士尼嘅煙燻火雞脾係遊客同日本人嘅NO.1推薦人氣美食,份量夠大又好味,攤檔成日都大排長龍。

▶︎ 販賣地點:失落河三角洲、神秘島

4. 阿拉伯海岸:咖喱薄餅

圖片來源|KKday

睇完神燈劇場,不如去附近嘅凱茲堡餐飲廣場食個咖喱印度薄餅!加埋餐廳嘅裝修同氣氛,好似真係喺阿拉丁嘅世界咁。

▶︎ 販賣地點:阿拉伯海岸嘅凱茲堡餐飲廣場

5. 米奇雪條

圖片來源|KKday

米奇米妮嘅雪條喺園區周圍都有賣,黃色嘅米奇係熱帶水果味,粉紅色嘅米妮係水蜜桃同紅莓,一年四季都有買。

五、推薦商品
1. Duffy系列商品

圖片來源|KKday

無論係Duffy、Shellie May、畫家貓Gelatoni、小兔Stella Lou,成個Duffy系列都好受歡迎!Duffy係日本海洋迪士尼嘅原創角色,去到呢度嘅專賣店,就梗係要盡情買啦!

美國海濱嘅「斐葛姑媽村莊商店」有最齊全嘅Duffy商品,門口有兩隻超大隻嘅Duffy同Shellie May坐喺長櫈迎接你,入面仲有公仔、袋、飾物、衫、餐具、文具,數都數唔晒,小心買到你唔捨得走!

▶︎ 販賣地點:美國海濱嘅「斐葛姑媽村莊商店」

2. 驚嚇米奇

圖片來源|KKday

喺玩完驚魂古塔嘅出口,就會見到超可愛限定商品—驚嚇米奇,呢個驚魂古塔嘅周邊商品好搶手,成日都冇貨!

▶︎ 販賣地點:驚魂古塔周邊商店

3. 頭箍、卡通造型帽

圖片來源|KKday

喺日本迪士尼,差唔多每個日本人都有個Dress Code,有啲人帶頭箍、帽,仲有一堆堆女仔著閨蜜裝,一齊扮米妮!嚟到夢幻王國,不如都入鄉隨俗,買啲小飾物影下相打個卡。

六、迪士尼海洋必做
1. 搵人氣角色影相

圖片來源|KKday

嚟到迪士尼,梗係要同各位迪士尼朋友合照!園區入面不定時會有唔同嘅迪士尼角色周圍走,亦都有合照點,可以將相機或者手機交俾工作人員幫你揸機影相,或者俾迪士尼專業攝影師親自操刀,再比錢買紀念相~

迪士尼明星迎賓會地點:
美國海濱 — 港岸公園:小熊Shellie May
美國海濱 — 漁村迎賓小屋:小熊Duffy
發現港 — 水平線海灣餐廳:米奇、米妮
失落河三角洲 — 致候吾友迎賓船塢:唐老鴨
失落河三角洲 — 迎賓小徑:高飛、米奇、米妮
阿拉伯海岸 — 現場揭曉
美人魚礁湖 — Ariel迎賓洞窟:美人魚Ariel
樂園入口 — 迪士尼海洋廣場 — 現場揭曉

2. 夜間煙花Show—Fantasmic

圖片來源|KKday

無論去邊嘅迪士尼大家都一定會做嘅就係—等睇煙花!而迪士尼海洋當然都唔會少咗呢個表演,夜晚喺地中海港灣嘅煙花絕對係全日嘅重頭戲,唔可以錯過!故事由魔法師學徒米奇開展,隨住劇情發展,加上巨大水幕、燈光、水花、火焰等特效,《阿拉丁》、《仙履奇緣》等等嘅迪士尼電影主角都會一齊出現。

3. 園內表演Show

圖片來源|KKday

除咗人魚礁湖劇場嘅《川頓王的音樂會》,失落河三角洲、美國海濱都會有舞台表演,而地中海港灣就會有大型嘅季節性主打活動。

4. 地標「水之行星」影相打卡

圖片來源|KKday

喺入口廣場嘅「水之行星」同樂園中央嘅「普羅美修士火山」都係海洋迪士尼嘅地標。「水之行星」更加係日本人同遊客嘅打卡地點,夜晚影出嚟嘅剪影效果都好靚!

心動不如行動啦:
▶︎ 【保證入園】QR Code入場! 東京迪士尼門票一日券
▶︎ 暢遊陸地海洋雙樂園!東京迪士尼兩日電子門票
▶︎ 迪士尼Fans最啱!三日・四日券・星光票

想去埋東京其他地方?KKday為你推介:
▶︎【東京必去】流行最前線 原宿表參道總攻略
▶︎【冬遊日本】新手必睇滑雪懶人包
▶︎【市區交通】最熱門JR Pass使用指南

認識KKday

想挑選心水行程又怕浪費時間比較?KKday 作為亞洲最大旅遊體驗平台,網絡橫跨全球 80 個國家、500 個城市,為您搜羅超過 10,000 種特色行程體驗。只需安坐家中,就能訂購世界各地具品質保證、價格實惠的旅遊產品,助你輕鬆自主行程,創造獨一無二的旅遊體驗。

▲前往KKday 網站,訂購心水行程!
▲下載KKday App與你同行,發掘更多在地旅遊體驗!
▲訂閱KKday電子報,獲取更多旅遊優惠!
FacebookInstagramYouTubeKKday群組

留言
KKday Hong Kong
訂完機票和飯店,當地旅遊體驗就交給KKday。 自己的行程自己排 – 海外潛水、戶外攀岩、料理課程、私房景點、 一日遊、票券、包車旅遊、機場接駁,各式世界當地旅遊行程任您挑選!
%d 位部落客按了讚: