環球旅遊

2016巴黎交通攻略|睇完之後去法國洗乜識法文?

image

想去巴黎?但係法國人唔鍾意講英文,又唔識法文可以點算?

KKdap App

其實,法國人冇你想像中咁cool,小編喺法國都遇過唔少熱情嘅巴黎人。不過,對於淨係識中英文嘅背包客黎講,巴黎嘅交通系統都真係幾棘手,因為幾乎全部資訊都係用法文寫。今日小編就用簡單嘅中文圖表同大家介紹下巴黎市區嘅交通網絡,等你就算唔識法文,都唔洗驚去到會兩頭望啦!

一、巴黎交通總覽:你喺邊一圈?

睇到呢張圖就已經頭暈眼花?定D黎!下面呢張地圖睇落好複雜,但對於大部分遊客黎講,真正要注意嘅其實淨係中間果兩個圈:

image

目前,成個Ile de France (大省)由中心向外擴散,總共有五個圈。揀交通方式之前,你一定要先知道自己黎緊行程活動嘅最大範圍,先可以知道點樣買飛最抵。

值得注意嘅係:巴黎嘅圈數同行政區唔同,我地一般會話巴黎有20區,呢個「區」指嘅係行政區。如果你將20區放到公共運輸圖來看,其實全都都係喺圈1-2入面,亦都即係俗稱嘅「小巴黎」。

大部分嘅觀光景點都喺小巴黎入面,只有少數幾個地方係例外,如:梵爾賽宮(圈4)、楓丹白露宮(圈5)或戴高樂機場(圈5)。

拉近D睇,小巴黎望落雖然好似好多個站,但遊客第一次黎會去嘅地方其實相當集中。

二、 巴黎地鐵種類

好啦明左城市分區係點,但有樣野更加令人頭痛:點解呢到有N種車比你揀!每種車能夠去到嘅地方都唔太一樣,大致上可以分為:

1.  METRO :

地鐵。好簡單姐,好似港鐵咁,站站停,但基本上淨係會喺圈1和圈2穿梭。

(flickr/Blog Viajes)

標誌係唔同顏色嘅圓圈+數字 :

image

2. RER:

呢個又唔係地鐵啦喎,呢個叫做聯外鐵路,香港地方咁細就冇呢類鐵路架啦,因為呢種鐵路淨係停大站,路線跨越圈1去到圈5。

image

(flickr/Renaud CHODKOWSKI)

標誌係RER+唔同顏色嘅圈圈+英文字母:

image

3. Train(Transilien):

火車,你當係長途版嘅東鐵線啦,通常要到指定車站到搭,多數都喺大車站開車(即係好似九龍塘呀尖東呀咁樣囉)。

image

(flickr/Alfenaar)

標誌係唔同顏色嘅正方形+數字:

image

4. Tramway:

同香港嘅輕鐵差唔多啦,不過就唔似香港話淨係新界區先有咁,你巴黎周圍都有可能揾到,要睇地圖揾站。

image

(flickr/michallon)

標誌係T+唔同顏色嘅圈圈+數字 :

image

三、票價

A. 單程票:

一次性車飛,用喺METRO地圖上面圈1同2以內嘅所有交通工具(但係唔包RER地圖上面嘅第二圈)。車票大概係咁嘅樣:

image

用單程票時,喺一個半鐘內可以轉搭其他路線或者交通工具,不過有D限制條件,淨係準幾種轉法:

1. metro轉metro

2. metro轉RER 或 RER轉RER(都必須喺兩圈以內)

3. bus轉bus

4. Bus轉tram 或 tram轉tram 。

每年元旦都會調整票價,2016年嘅單程票一張係1.8歐羅,如果一次買10張係14.10歐羅,半價票(4-10歲嘅小朋友)10張係7.05歐羅。上巴士時都可以直接同司機買,但淨係可以一張一張咁買,而且一張要2歐羅,其實唔抵。

image

B. 特定票:

有指定起點終點嘅一種車飛。通常係要由小巴黎(圈1-2)去其他圈,又或者本身喺外圈而要番去小巴黎時,就會用到呢種車飛。票價按照跨越圈數同埋距離計算,你好似喺香港咁去部自動售票機禁起點同終點,一次過買10張都有八折優惠架。

通常遊客第一次買特定票,都應該係為左由機場去市區:

巴黎戴高樂機場→小巴黎任何一個地方:單程10歐羅

(開車時間:0600-0030,15-20分鐘一班)

小巴黎任何一個地方→巴黎戴高樂機場:單程10歐羅

(開車時間:0515-0030,15-20分鐘一班)

C. ★特別推薦——NAVIGO週票(月票)

用呢張卡就冇曬關於圈數嘅煩惱!如果你有左呢張卡,比左果個禮拜(或者果個月)嘅錢,巴黎嘅交通就任你搭!第一次申請嘅手續費係5歐羅,跟住你再視自己嘅需要,增值番你相對嘅交通費用:

image

需要特別注意嘅係,週票和月票嘅概念唔係由入錢果日開始計算,而係逢星期一當做一個禮拜嘅開始,所以週票係由星期一開始計到星期日。就算你喺星期二或者星期三入左錢,效期一樣都淨係去到星期日,所以你愈遲增值就愈蝕底。(月票嘅計法就係由果個月一號開始,唔理你幾時去入錢都淨係可以用到月底)

D. Mobile一日票

一日內無限搭,不過就唔準用黎去機場!如果想用呢張飛去機場,咁淨係可以搭普通巴士,而唔係由OPERA出發嘅特快巴士。(就算你買嘅係包含曬五圈嘅票種,一樣唔得。)

票價跟圈數訂定:1–2圈7歐羅,1–3圈9.3歐羅,1–4圈11.5歐羅,1–5圈16.6歐羅。

E. Ticket Jeunes Week-end 青年週末一日票

比26歲以下嘅青年一日內無限搭,但淨係星期六日同公眾假期,而且一樣唔可以用黎去機場。

票價跟圈數訂定:1–3圈3.85歐羅,3–5圈4.9歐羅,1–5圈8.35歐羅。

F. PARIS VISIT

「拜訪巴黎」觀光周遊券。包曬交通飛同景點門票折扣功能,以日數黎區分票價,有一、二、三、五日唔同票種,揀完日數之後,再揀交通圈數 (得1-3同1-5兩個選擇) ,用呢種飛係可以去機場架。(揀1-5圈而且上面有架飛機仔果種就得)

image

基本上巴黎觀光旅遊嘅票價同票種真係多到喊出黎,而且每隔一段時間仲會調整票價。所以,呢到整理左嘅2016年最新票價與票種資訊,內容都係參照番官網。出發之前,唔好唔記得左Check多次官方公布嘅即時票價資訊,了解番最新嘅優惠條款呀!

當然,睇完攻略同守則,你都仲係覺得麻煩嘅話,都可以選擇機場接送服務

另外,難得黎到巴黎,除左沿住地鐵睇名勝古蹟,你都應該試下與眾不同嘅體驗:

>>>什麼樣嘅法式料理最好吃?當然係自己做嘅!

>>>來法國必學嘅一門課:品酒

▲認識KKday▲

KKday-世界旅遊體驗網站,在全球 53個國家,170 個城市, 有 3000多種不同的行程與體驗。 KKday內有最特別、最意想不到的的世界行程體驗!不論你想當一日忍者、乘坐直升機享盡奢華旅程、還是你想要與猩猩共進午餐…KKday滿足旅人不同的喜好。KKday幫你省去在各論壇爬文找資料的麻煩,一站解決安排行程的困擾!現在,想來一場與眾不同的旅行就來KKday找行程,一起去冒險吧!

KKday 網頁:www.kkday.com
KKday  Facebook: KKday

認識KKday

想挑選心水行程又怕浪費時間比較?KKday 作為亞洲最大旅遊體驗平台,網絡橫跨全球 80 個國家、500 個城市,為您搜羅超過 10,000 種特色行程體驗。只需安坐家中,就能訂購世界各地具品質保證、價格實惠的旅遊產品,助你輕鬆自主行程,創造獨一無二的旅遊體驗。

▲前往KKday 網站,訂購心水行程!
▲下載KKday App與你同行,發掘更多在地旅遊體驗!
▲訂閱KKday電子報,獲取更多旅遊優惠!
FacebookInstagramYouTubeKKday群組

留言
KKday Hong Kong
訂完機票和飯店,當地旅遊體驗就交給KKday。 自己的行程自己排 – 海外潛水、戶外攀岩、料理課程、私房景點、 一日遊、票券、包車旅遊、機場接駁,各式世界當地旅遊行程任您挑選!
%d 位部落客按了讚: